Օհաննէսեան Հայկական Վարժարանը իր հիմնադրութեան առաջին իսկ օրէն դարձած է Տուպայի եւ Հիւսիսային Էմիրութեանց հայ համայնքին հոգածութեան եւ գուրգուրանքի առարկան : Իրերայաջորդ հոգաբարձական կազմի անդամները եղած են հոգալու համար վարժարանին բոլոր կարիքները ու պէտքերը:
Անոնք մշակած են դպրոցի ուսումնական եւ արտադասարանային ծրագիրները, ապահոված են աշակերտութեան դպրոցական պահանջքները , ինչպէս համազգեստ, գրենական պիտոյք , նախաճաշ , վիճակացոյց : Անոնք մասնակից եղած են դպրոցի տարեգիրքերու եւ օրացոյցերու պատրաստման եւ հրատարակութեան աշխատանքներուն: Անցեալի թէ այժմու հոգաբարձական կազմերը եղած են խորհրդատու կազմեր դպրոցին այլեւայլ հարցերու բարուոք լուծման համար եւ մեծապէս սատարած են անոր բարգաւաճման:
Հոգաբարձական կազմերը հաւատացած են եւ կը հաւատան թէ մեր դպրոցը իր աշակերտութեան կը մատակարարէ հայու ինքնութեան աւիշ, կը դաստիարակէ ապագայ սերունդները, կը դարբնէ զանոնք հայու միտքով ու ոգիով, անոնց կը ջամբէ պատասխանատուութեան գիտակցութիւն. այնտեղ է, ուր կը պատրաստուին գաղութի գործունեայ եւ յանձնառու անդամները :
Միայն առաջին երկու տարիներուն է (1980-1982), որ վարժարանը եղած է Ազգային Վարչութեան անմիջական հսկողութեան տակ: 1982-էն ի վեր հոգաբարձական կազմերը կարողացած են ապահովել յաջորդականութիւն ՝ դպրոցի յաջող ընթացքին: Հոգաբարձութիւնը միշտ երախտապարտ եղած է հայ համայնքին , որ քաջալեր հանդիսացած է որպէսզի կարենայ իրեն վստահուած առաքելութիւնը իրականացնել :
Դպրոցի հոգաբարձութեան հետ կարելի է կապ հաստատել ձեր ե-նամակները ուղարկելով հետեւեալ հասցէին BoardOfTrustees@EmaHay.com
